夏博義上月開始出任香港大律師公會主席,然後別有用心的建制派傳媒發現,原來夏博義是英國自由民主黨牛津市聖瑪格列特選區前議員。之後大家齊齊表示夏博義屬於外國勢力,插手香港事務。夏博義事件令我諗起一個人,呢個就係發出公開信炮轟夏博義擔任大律師公會主席是荒天下之大謬的梁振英。

夏博義今年一月當選香港大律師公會主席。張凱傑攝

夏博義係英國人,在英國接受教育係不爭嘅事實,除非你走去問郭偉強之流嘅人士,先至有機會誤會夏博義同夏雨或者夏韶聲有親戚關係,就好似英國《衛報》同埋世界衛生組織咁樣。至於夏博義獲提名參選大律師公會主席之時已經辭去相關議員職位,而且根本沒有條文規定大律師公會主席參選人不得有任何政治聯繫及申報自己的政治背景或立場。至於夏博義遭到圍攻嘅理由相信係因為佢提出修改港區國安法嘅主張。其實喺香港嘅外籍律師對於法律指指點點,並唔係只有夏博義先至咁做,江樂士同列顯倫何嘗唔係外國勢力?呢兩個擺到明就係外國勢力嘅本港外籍律師,不過佢哋出盡全力奶共,建制派就拍爛手掌。作為大律師公會主席提出專業意見就畀人圍毆,你話呢件事有冇政治考慮呢? 

不過呢件事件就令我諗起前特首梁振英。《頭條日報》嘅盧永雄周三(10日)用上極大篇幅評論事件,當中提到「今年一月競逐香港大律師公會主席前,急急辭去英國市議員的身份,在選舉時卻完全沒有披露」。盧永雄你講得好呀,有啲嘢的確係需要申報同埋披露㗎(現時無條文規定大律師公會主席參選人不得有任何政治聯繫,及必須申報自己的政治背景或立場)!

2013年3月25日,梁振英擊敗對手唐英年,當選特首。美聯社資料照片

大家記唔記得前特首梁振英在2011年與澳洲企業UGL達成協議,分兩年收取400萬英鎊,折合約港幣5,000 萬元,收款時已經上任特首。梁振英正式宣布參選之日,正值他持股的戴德梁行控股公司DTZ賣盤。梁振英在造勢大會之後5 天,與提出收購的澳洲企業UGL簽了協議,UGL保證DTZ會在正式被收購前,支付欠他的150萬英鎊花紅。另外,UGL 還承諾給予梁振英400萬英鎊,合約於2011年12月2日簽署。根據協議,400萬英鎊分兩期,在2012年及2013年的12月支付,亦即是梁振英就任特首之後。梁振英的利益申報表中,受薪工作一欄沒有申報這筆款項。事件怎樣發展下去,大家相信依然歷歷在目。點解梁振英就任特首期間繼續收取UGL提供的五千萬元現金可以無須申報,相反夏博義在參選之時已經辭去牛津市議員職位,而且相關規定沒有違反大律師公會主席選舉條例,建制派卻要鍥而不捨地追擊呢?

建制派真係好得意,人哋一個大律師公會主席選舉就要大做文章;特首就任特首之後收咗五千萬,建制派不斷拉布,阻止成立調查委員會,然後周浩鼎更加將有關文件交畀特首辦修改。建制派你哋真係咁正義,定係你覺得大律師公會主席一職比起特首更重要,所以夏博義跟足規矩參選就要畀你哋批鬥,梁振英收五千萬就要你哋出盡全力護航?

Source

作者: HK in UK