【Now財經台】英倫銀行將買債規模擴大1倍，每日上限100億英鎊，英國30年及10年期債息續升，英鎊則受壓，喺1.1水平徘徊，央行透過「泵水」去債市，同埋推出流動性工具，解決當地退休基金爆煲問題，可唔可以成功「拆彈」？
iFast Global Markets副總裁溫鋼城指，英國要成功拆彈會比較複雜，因為英國加息步伐較慢，加上英鎊弱，當地通脹又高，放寬貨幣政策及減稅會增加政府債務負擔。佢又話，英國唔少退休基金投資英國國債，如果債息持續抽升，投資者擔心會爆發新版歐債危機，一旦由英國引爆新一場歐債危機，影響會比當年更大。
英國新政府方面，Harris認為，首相卓慧思嘅內閣比較幼嫩，投資者會比較擔心，加上新政府經驗淺，上場後民意支持度急速下滑，一出現問題就要「頭痛醫頭，腳痛醫腳」。佢續指，歐洲依家有好多問題，英國嘅問題最終會點解決，相信要等到美元穩定返，甚至可能要換走卓慧思，否則，問題唔會咁易解決。