蘇斯克查上月被曼聯炒魷後，曾經表示會先陪家人一段時間再搵後路，不過英國《The Athletic》報道，原來呢位挪威名將一直都冇返挪威，仍然留喺英國生活，因為佢同曼聯仍然有瓜葛！
蘇斯克查老婆Silje同兩個囝囝Noah及Elijah，依家都已經返咗挪威，但係「蘇B」就繼續留低，事關囡囡Karna仍然係曼聯女足球員之一，所以兩人預計要到聖誕節先會返鄉下過節，唔排除會繼續留喺英國發展。
雖然喺球迷嘅反對聲音中離開，蘇斯克查日前被球迷發現仲喺英國嗰陣，亦上演暖心一幕，據報當時「蘇B」喺一間外賣店買壽司，期間被一班曼聯球迷認出並作出感謝，蘇斯克查就回應：「我已經盡咗力」。