每逢國際賽期都係球會噩夢，除咗要擔心球員受傷之外，最頭痛係要接一班跨洲比賽嘅球星返嚟歐洲比賽。英超多支球隊為接旗下美洲兵出盡法寶，曼聯、列斯聯、曼城同利物浦聯手租用私人飛機，接載一班巴西兵返英國，而韋斯咸就最豪，掟10萬鎊去接牙買加前鋒米查利安東尼奧返倫敦。
利物浦門將艾利臣比加喺IG貼相，顯示巴西喺世盃外對阿根廷後，佢同法賓奴、加比爾捷西甲、艾達臣摩拉斯、拉芬夏比洛尼同費特6人，一齊喺私人飛機上面合照，個個都神情輕鬆，似系呢段旅程都好舒適。不過倫敦三雄代表加比爾馬加希斯(阿仙奴)、堤亞高施華(車路士)同艾馬遜(熱刺)就冇份上機，相信係另有安排。
不過最揼本嘅就係韋斯咸，佢哋主力射手米查利安東尼奧今次國際賽期為牙買加上陣2場，佢亦2場都有入波，原本預計周三(18日)先至會返到倫敦，不過主席蘇利雲就決定斥資10萬鎊，租私人飛機接佢返嚟，令歸隊時間可以提前1日，周六(20日)作客狼隊嘅英超隨時候命。