(Getty Images)
英國傳媒爆料，指愛華頓中場球星「J神」占士洛迪古斯已經被球會放棄，佢甚至已經離開英國，將會去中東搵食，加盟卡塔爾球隊。
據悉，30歲嘅占士洛迪古斯上周日(19日)現身曼徹斯特機場，乘坐前往卡塔爾嘅航機，由於卡塔爾聯賽轉會市場要等到9月30日先至關閉，呢位哥倫比亞國腳仍然有足球時間完成轉會手續。
占士洛迪古斯早前話：「我唔知會去邊度踢波，但我一直努力操練，做好準備，依家情況好困難，我希望加盟一支需要我嘅球隊。」
占士洛迪古斯上年9月獲得「契爺」安察洛堤力邀，由皇馬轉投愛華頓，初時有唔錯表現，但之後受到傷患困擾，加上安察洛堤今季轉投皇馬，愛華頓新帥賓尼迪斯唔鍾意「J神」，一直冇派佢上陣，離開成為佢唯一出路。