【明報專訊】移民潮下醫管局持續流失人手，最新傳出會走嘅係外科醫生馮德焜，佢除咗要向公立醫院辭職，仲要向醫學會辭任義務秘書。醫學會會長蔡堅話佢會去英國牛津有工做。咁佢係咪移民呢？蔡堅話留畀佢自己答，但係馮德焜就婉拒訪問。
為咗填補醫學會義務秘書空缺，蔡堅提名醫學界立法會議員陳沛然頂替，醫學會會董會上周二討論後通過委任。除咗醫學會，馮德焜仲做過公共醫療醫生協會執委，同埋已解散嘅杏林醒覺成員。
最近傳出唔少醫生要移民，蔡堅又走唔走呢？佢話自己九七前走過，手上有BNO同加拿大護照但都過咗期，家陣一把年紀就唔走喇，因有啲病人已睇咗佢40年，有啲仲兩三代都睇佢，做私家醫生唔似公立醫院有其他人接手，佢始終要做落去。