阿古路已換上巴塞波衫。(Getty Images)
阿根廷名將阿古路來季加盟巴塞隆拿，希望可以同老友美斯拍住上，但佢喺英超效力咗曼城10年，都好唔捨得，畢竟留下好多感情，據悉佢離開前，向藍月亮嘅員工每人送咗隻錶，花費超過6萬鎊。
據報指阿古路為咗答謝曼城球會嘅員工，每人都送上一隻名錶，有唔同牌子同型號，最貴嘅價值1650鎊，共有60位員工獲得呢份特別禮物，每人嘅手錶上都刻有西班牙文「感謝」字樣，真係好窩心。
此外，阿古路仲畀每位員工有大抽獎，大獎係佢一部價值4萬英鎊嘅名車，最終由一位負責管理球衣嘅員工中獎。