賭神班主點止「3千分」
英超二線奇兵「海鷗」白禮頓，愈戰愈強；尤其場外球員買賣，媲美當年李斯特城神奇封王再散貨後，最成功一隊，大賺特賺。日本球員「3千分」三笘薰火箭式上位，成就佢哋個買賣系統衝上另一高峰。
個子唔高、身形瘦削嘅三笘薰起點低，年半前仲幫緊川崎前鋒踢亞冠盃、轉會費250萬英鎊；先外借到白禮頓位賭神班主、撲克高手布隆(Bloom)做大股東嘅比甲升班馬聖基萊斯聯一季。呢兩間「姊妹」球會近年透過老闆嘅數據分析公司Starlizard(星蜥蜴)，買入唔少極有潛力嘅球員，聖基萊斯聯上屆一升比甲即封王，今屆喺歐霸分組賽首名出線，唔係偶然。白禮頓同步起飛，上屆5千萬英鎊賣走當年修咸頓青年軍唔要嘅守將賓韋特，今屆賣走古古列拿、比蘇馬同李安度杜沙特，已攞返成億英鎊；如今兩大防中摩西斯卡些度，同阿歷斯麥阿里士打，加埋「3千分」，估值共逾2億英鎊，仲有個橫空出世嘅18歲中鋒伊雲費格遜。隊波新人繼續接得上，英超疊水球會太多，猶太人出身嘅布隆識做生意，只係善價而沽啫。