(Getty Images)
英國首富拉特克利夫早前正式確認，準備收購曼聯之後，事件有新進展，根據英國《每日郵報》爆料，呢位富商出價40億鎊買紅魔鬼，遠低於曼聯班主格拉沙家族要求嘅60億鎊，可能令交易告吹。
格拉沙家族上年11月宣布計劃將曼聯賣盤之後，拉特克利夫成為首位正式提出接貨嘅買家，加上佢本身係紅魔鬼球迷，一度備受睇好可以入主曼聯。不過，原來拉特克利夫只願意出40億鎊收購，立即令交易成事機會大減。
因為格拉沙家族認為紅魔鬼起碼值60億鎊，特別係以保利為首嘅美國財團上年收購車路士，都用咗42.5億鎊，曼聯冇理由平過車仔。早前有統計指曼聯屬於現時英超最值錢球會，達到48億鎊，第2位利物浦值38億鎊，曼城以35億鎊排第3位。
擁有150億鎊身家嘅拉特克利夫出價40億鎊似乎低過市價，但格拉沙家族嗌60億鎊，亦太過火，預料雙方仲有討價還價空間。