【Now財經台】市場普遍預期，今年全球經濟會步入衰退，不過，據英國《金融時報》嘅經濟調查顯示，英國或面臨七大工業國(G7)中最嚴重嘅衰退。
受訪嘅101位經濟學家中，大部分預期英國疫情及俄烏戰事導致嘅通脹問題，將會較其他國家持續更耐，迫使英倫銀行維持高利率，以及英國政府收緊財政政策，而唔少經濟師喺過去1年，都預期英國2023年經濟增長會比歐元區更疲弱。
不過，資深經濟師羅家聰認為，比較數據會發現G7經濟體都唔太掂，唔認為英國經濟衰退會特別嚴重。
KC又指，德、法嘅通脹似乎有向下趨勢，令市場憧憬歐洲區央行或有藉口減息，但佢認為機會唔大，通脹數據向下主要受惠於近月能源價格大幅回落，扣除能源、食品等價格波動商品嘅核心通脹率，其實同1年前差唔多，其中德國嘅數據更有向上趨勢。