【Now財經台】英國政府擬推出大規模減稅方案，導致金融市場動盪，英國財相關浩霆喺一片爭議聲中，宣布撤回取消45%最高所得稅計劃，雖然有關消息喺本港時間中午2時後才確認，但英鎊喺中午已率先炒起，一度升上1.128，衝上逾1周高位，不過，消息確認後，英鎊掉頭回落，英國嘅財政、通脹問題未解決，英鎊短線反彈係咪已結束？應唔應該追沽？
獨立外匯商品分析師譚家康指，依家炒非美貨幣主要睇住美債息，美債息升，美元就跟升，近日2年期美債息喺4厘水平橫行，不同非美貨幣都有得彈，包括英鎊，佢估計，英鎊未來走勢會同其他G10國家嘅貨幣差唔多，由於美元持續強勢，因此，一般非美貨幣會繼續尋底，英鎊之前低位1.03，會係短期支持位，投資者喺1.15至1.18沽出會較理想。