【Now財經台】英倫銀行會喺下周四議息，如果再加大加息力度，經濟有可能加快下滑，不過，如果維持漸進加息，又會令通脹失控，英鎊兌美元早段重上1.16，喺缺乏經濟基本面支持下，英鎊後市係咪仍有機會轉弱？
資深外匯分析師陳欣指，英鎊成個基本面都好差，雖然新上場嘅英國保守黨黨魁、候任首相卓慧思有大膽嘅計劃，包括凍結英國家庭全年電費及燃氣帳單價格，撤銷加企業稅等，不過，呢啲措施會令公共支出大增，仲有機會進一步推高通脹。
佢又話，就算英倫銀行大手加息，都未必可以遏制通脹，因此，不論卓慧思或英倫銀行都好難令英鎊有支持，喺強美元及避險情緒影響下，估計資金會持續流出，令英鎊進一步向下及持續弱勢。
 |
陳欣 樂天證券香港銷售總監 |