唔經唔覺我哋已經嚟咗英國差唔多兩個月，嚟咗呢度咁耐，行得最多嘅一定係超級市場啦！我哋日日都煮飯，所以已經初步了解各大英國超級市場品牌嘅特色，同邊間英國超級市場有多啲香港或亞洲嘢賣。我哋就為大家整理咗以下10大英國超級市場品牌，從價位、特色、會員計劃，甚至禮品卡等至平英國超級市場購物攻略。
- 英國低價超市：ASDA、Lidl、ALDI
- 英國平價超市：Sainsbury’s、Tesco
- 英國中價超市：Marks & Spencer Food、Morrisons、Co-Op
- 英國高價超市：Waitrose
- 英國冷凍超市：Iceland
英國低價超市：ASDA
ASDA係Walmart旗下嘅英國超級市場品牌，喺英國有超過600間分店，多數分店都係偏離市區嘅地方。不過ASDA嘅貨物齊全，大型Superstore 24小時營業（星期六、日除外），設有眼鏡舖、藥房、戶外傢俬部、就連大型電視都有得賣。ASDA有唔少嘅亞洲食品選擇，有歐洲版出前一丁、韓國辛拉麵、李錦記醬汁等。最吸引嘅係價格比Tesco和Sainsbury’s平，絕對適合一次過去大量採購！
💰價位：💲💲
💡特色：價錢平，不過分店唔多，多數都係偏離市區嘅地方先有分店
🙋🏻♂️會員計劃：大家一定要做埋ASDA Rewards 會員，每次買嘢都可以完成唔同嘅任務，可賺取獎賞同優惠券，買精選產品仲有額外優惠添！
🎁禮品卡：大家仲可以喺TopCashBack買ASDA Gift Card，有1.6%回贈，真係抵上加抵！大家可用呢條專屬連結登記TopCashBack户口，即享£10登記獎賞（利申：我哋亦同時可以獲得獎賞）！
英國低價超市：Lidl
Lidl係嚟自德國嘅超低價英國超級市場品牌，喺英國有超過800間分店，完全打正低價旗號！廣告強調喺Lidl同其他英國超級市場買一籃子同種類產品，Lidl係平成20%。不過Lidl賣嘅產品多數都係自家品牌，比較難搵到大牌子嘅產品。另外，Lidl嘅蔬果種類非常齊全，而且都好新鮮。不過Lidl店鋪比較擠迫同混亂，好多貨品都係喺紙箱入邊，家品部完全係雜架攤，所以我哋都好少去Lidl。
💰價位：💲💲
💡特色：以低價為招徠
🙋🏻♂️會員計劃：精明嘅你當然要申請埋Lidl Plus會員，逢星期四都會有新優惠券，只需要每個月達到指定消費金額，就會有免費麵包或現金券，真係好抵！
英國低價超市：ALDI
ALDI同樣係來自德國嘅超低價英國超級市場品牌，喺英國擁有900幾間分店。佢同Lidl好相似，大部份嘅貨品都係自家品牌，比其他英國超級市場平。每星期仲有六款新鮮食品特價，質素都好好。不過ALDI嘅店舖比Lidl整齊同乾淨，所以我哋比較鍾意ALDI。
💰價位：💲💲
💡特色：以低價為招徠
🙋🏻♂️會員計劃：無
英國平價超市：Sainsbury’s
Sainsbury’s係英國第二大嘅超級市場，有超過1400間分店，去親邊度，都總會見到一間Sainsbury’s或者Sainsbury’s Local。店舖乾淨企理，價錢較Waitrose同M&S Food平，屬於平價英國超級市場。Sainsbury’s仲設有熟食攤檔同麵包舖，而Sainsbury‘S Local都係比較細，提供生活必需品同基本蔬果食材。最正嘅係Sainsbury’s有唔少嘅亞洲食品選擇，有歐洲版出前一丁、韓國辛拉麵、李錦記醬汁等。
💰價位：💲💲💲
💡特色：分店遍佈英國，設有亞洲食品World Food專區
🙋🏻♂️會員計劃：Sainsbury’s超級市場嘅會員計劃叫做Nectar，類似香港嘅易賞錢，除咗係Sainsbury所以儲分之外，仲可以喺Argos、eBay、Esso、Nectar Hotels同其他合作夥伴儲分，積分可以換領優惠同產品。
英國平價超市：Tesco
Tesco係英國最大嘅超市品牌，英國有3000幾間分店，真係總有一間係你左近。Tesco嘅價錢同Sainsbury’s差唔多，貨品選擇種類都幾多。Tesco Extra規模最大，商品最齊的，除咗一般超級市場物品之外，仲有電器、衣服、文具生活用品等，仲要係24小時營業（星期六、日除外）。而Tesco Superstore就比Tesco Extra細啲，不過選擇都仍然好多，只係非食品嘅選擇會比Tesco Extra少。至於，Tesco Express店舖較細，類似便利店，提供基本生活用品同蔬果食材。
💰價位：💲💲💲
💡特色：分店最多，總有一間係你附近
🙋🏻♂️會員計劃：Tesco Clubcard會員係一定要申請，因為店舖有大量會員專享優惠，而且每次購物都可以儲分，換現金券。
英國中價超市：Marks & Spencer Food
相信好多香港人對Marks & Spencer馬莎百貨同M&S Food一啲都唔陌生，店舖設計同產品都同大家喺香港見到嘅都差唔多，價錢比香港平好多。我哋多數係去買餅乾、薯片同Wine Gums！
💰價位：💲💲💲💲
💡特色：全店售價自家品牌M&S產品
🙋🏻♂️會員計劃：大家記住申請M&S Sparks會員，雖然唔係一個儲分嘅計劃，但係會根據你購買嘅貨品，送你個人化嘅優惠券，經常有免費產品送畀你。另外，你每次用Sparks會員卡購物，M&S都會捐款俾你選擇嘅慈善機構。
🎁禮品卡：大家仲可以喺TopCashBack買M&S Gift Card，有4.75%回贈，真係抵上加抵！大家可用呢條專屬連結登記TopCashBack户口，即享£10登記獎賞（利申：我哋亦同時可以獲得獎賞）！
英國中價超市：Morrisons
Morrisons相對其他英國超級市場比較少見，因為英國只有400幾間分店。店舖光猛清潔，種類繁多，最大嘅賣點就係大型分店設有Fishmonger海鮮檔同Butcher鮮肉檔，仲有即場烘焙嘅麵包同烤雞。
💰價位：💲💲💲💲
💡特色：設有Fishmonger海鮮檔同Butcher肉檔，新鮮Bakery麵包檔
🙋🏻♂️會員計劃：My Morrisons會員計劃雖然唔係儲分，但係會根據你購買嘅貨品，送你個人化嘅優惠券。
🎁禮品卡：大家仲可以喺TopCashBack買Morrisons Gift Card，有2.5%回贈，真係抵上加抵！大家可用呢條專屬連結登記TopCashBack户口，即享£10登記獎賞（利申：我哋亦同時可以獲得獎賞）！
英國中價超市：Co-Op
Co-Op係另一英國超級市場零售品牌，喺英國有超過2600間分店。我哋經過或者行過嘅Co-Op都比較細間，所以比較似便利店，產品選擇較少，而且價格都比平價超市貴，有時更貴過Waitrose，所以我哋都好少去。
💰價位：💲💲💲💲
💡特色：無
🙋🏻♂️會員計劃：大家要俾£1入會費，先可以加入Co-Op Memerbship，相比其他唔使錢入會嘅超市會員，真係一啲都唔吸引！
英國高價超市：Waitrose
Waitrose係英國知名百貨John Lewis旗下嘅英國超級市場，喺英國擁有300幾間分店。Waitrose行高品質路線，超市環境乾淨企理，設有Fishmonger海鮮檔、Butcher肉檔、Bakery麵包檔同壽司檔，風格類似香港Citysuper。另外，Waitrose嘅蔬菜水果品質都經過嚴格把關，有埋皇家認證，絕對有保證，所以價錢都比較貴。
💰價位：💲💲💲💲💲
💡特色：設有Fishmonger海鮮檔同Butcher內檔，蔬果有皇家認證
🙋🏻♂️會員計劃：大家記住申請MyWaitrose會員，雖然唔係一個儲分嘅計劃，但係會根據你購買嘅貨品，送你個人化嘅優惠券，每個星期都可以選擇兩張。會員仲專享海鮮檔、肉檔等嘅限定八折優惠。Waitrose仲為會員提供免費咖啡或茶，不過依家就暫時停咗。
🎁禮品卡：大家仲可以喺TopCashBack買John Lewis & Partners Giftcard，有2.5%回贈，真係抵上加抵！大家可用呢條專屬連結登記TopCashBack户口，即享£10登記獎賞（利申：我哋亦同時可以獲得獎賞）！
英國冷凍超市：Iceland
就咁睇個名Iceland都知佢賣冷凍食物，佢係英國嘅冷凍超市，大部份嘅貨品都係冷凍食物，有海鮮、肉類、蔬菜、薯條、Pizza同雪糕等。除咗冷凍食品之外，都有少量嘅新鮮蔬果同家庭用品。第一次入去嘅時候，見到好多黃色減價牌，感覺都覺得好平，但係仔細比較過，都係ASDA、Lidl同ALDI最平。
💰價位：💲💲💲
💡特色：絕大部份貨品都係冷凍食物，所以係冷凍食品專門店，最適合打爆屋企個冰箱
🙋🏻♂️會員計劃：無
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com