繼簽入蘇格蘭「神童」賓杜克後，利物浦近日再接近從鴨巴甸簽入18歲右閘卡雲藍斯，據聞「紅軍」更即將以300萬英鎊，爭贏列斯聯等球隊，搶簽呢位蘇格蘭年度最佳新人獎得主。
18歲嘅卡雲藍斯出身自蘇超球隊鴨巴甸，今季獲得好多機會，為母會共上陣33場並交出9次助攻，以一位右閘嚟講助攻能力非常出眾。今季佢更加獲蘇格蘭足球記者協會，選為年度最佳年青球員，隨即引起唔少英超球會關注。雖然年紀輕輕就獲獎，但佢早前受訪就表現得好謙卑：「上一隊、希望有一日轉去大球會，一定係年輕球員夢寐以求嘅事，我要繼續學習同保持冷靜，唔能夠衝昏頭腦。」
據英國《太陽報》報道，列斯聯曾派人考察過佢，而利物浦領隊高普亦對佢好有興趣，打算以300萬英鎊將佢收歸旗下，將佢改造成第2位阿歷山大阿諾特。卡雲藍斯續指：「我仲好年輕，而且今季只係我嘅第一季，所以我要嘗試建立更多，同給予自己更多信心。」