鍾劍華表示暫時喺英國居住一段時間，強調並非移民。
香港民意研究所副行政總裁鍾劍華日前離港赴英，並透過社交平台貼文，指自己打算喺海外生活一段時間。鍾今日(26日)交代更多細節，話佢同研究所嘅合約將於本月底到期，並澄清3次約見警務處國家安全處只係協助調查。
已經身在英國嘅鍾劍華，今日以視像形式出席民意研究所發布會。佢話2月18日收到批准簽證，而國安處3月約談，兩樣嘢冇關係。佢暫時會喺英國居住一段時間，強調並非移民，研究所行政總裁鍾庭耀早已知悉。佢話國安處前後3次邀請佢協助調查，並非警告或者檢控。
另外，鍾話同研究所嘅合約將喺4月底到期，唔可以代表研究所回答未來路向，但表示從未討論是否解散。由於未知本周五係咪有需要出席，可能今次係佢最後一次以副行政總裁身份出席研究所嘅發布會喇。