（Getty Images）
穆罕默德沙拿同利物浦嘅合約談判出現轉機！周日（3日）英國媒體報道，沙拿準備向球隊作出讓步，接受40萬英鎊周薪嘅待遇，並同球隊續約3年，無疑為「紅軍」喺今季爭冠道路上打下強心針。
29歲埃及國腳穆罕默德沙拿，今年喺國家隊遭遇唔如意，先失落非國盃冠軍，又未能助祖國打入世盃決賽周。早前佢同利物浦嘅合約談判更一度陷入僵局，將於明年夏天完約嘅佢希望加薪至50萬英鎊周薪，同效力曼聯嘅C朗平起平座，但球隊早前卻以勢打破隊內薪酬結構為由拒絕，一度傳出沙拿明年將完約離隊。
不過近日據英國《鏡報》報道，沙拿喺同球隊嘅續約問題上出現新轉機。據聞沙拿已經回心轉意，答應球隊提出嘅40萬鎊周薪續約條件，並將簽約多3年，續延佢嘅傳奇「紅軍」生涯。早前佢接受英國《天空體育》訪問時便向利物浦表明心迹：「如果你問我，我會想繼續留低直至掛靴。我唔能夠想像有一日我要倒戈利物浦，如果係咁我會好傷心。」