英格蘭3年前喺世界盃殺入4強，領隊修夫基件馬甲背心立即成為時裝潮流，唔少球迷衝去官方贊助商馬莎度買呢件價值65英鎊嘅型仔背心。今屆歐國盃修夫基轉換造型，但佢條波點領呔同樣引起關注，修夫基今屆帶住呢條可愛領呔有100%勝率，難怪被球迷稱為「幸運領呔」。
修夫基今屆歐國盃嘅服裝係由Pervical贊助，據報佢所有衣服總值680英鎊，不過當中就以一條白色波點領呔最引人注意。今屆英格蘭5場比賽，修夫基有4場都打呢條領呔，結果全部順利贏波，唯一一場冇打波點呔，英格蘭就同蘇格蘭悶和0比0，所以大批網民都呼籲修夫基要繼續Keep住呢個造型。
3年前世界盃，修夫基帶挈馬莎嘅馬甲背心銷售激增35%，今次Pervical亦唔執輸，宣布呢條白色波點領呔今個星期正式喺網上發售，價錢係49英鎊，隨時又會掀起搶購熱潮。