曾四奪奧運金牌，衝冕10,000米嘅英國跑手法拉 (Mo Farah)，噚日 (26日) 完成最後一場達標賽，以19.04秒之差未能達標，正式無緣東京奧運。
今次呢場係英國錦標賽，為 Sir Mo 特設嘅10,000米邀請賽，可惜佢最後只能跑出27:47.04，未達到27:28.00 嘅東奧標準。由於係邀請賽關係，法拉要獨自完成最後九個圈，可惜唔能夠保持速度，但佢話責無旁貸。
38歲嘅法拉賽後接受訪問，話自己已經盡晒力，若果已經無法同頂尖跑手競爭，或者係時候放多啲時間喺家庭 (I’m one of these athletes who, if you can’t compete with the best, why bother? Maybe it’s time to spend time with my kids.)。
事實上，6月初法拉曾經講過，如果喺東京再奪奧運金牌就會告別田徑場。今次嘅失敗，會唔會係大家最後一次見到佢喺跑道比賽呢? 抑或會再次轉戰路跑，再挑戰馬拉松? 相信佢本人都要啲時間先決定到。
資料: BBC
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。
分享連結: