瑞典前鋒伊巴謙莫域一身蟻!歐洲足協日前宣布成立紀律小組,調查AC米蘭前鋒伊巴謙莫域涉嫌違反博彩條例,違規持有一間博彩公司10%股份,有可能面對長達3年嘅停賽處分。考慮到伊巴謙莫域已經39歲,一旦被判罰長期停賽,足球生涯幾乎可以肯定提早完結。

瑞典報章《Aftonbladet》爆料,伊巴謙莫域喺2018年出任馬爾他博彩公召Bethard大使,同時透過名下公召Unknown AB買入Bethard一成股份,成為呢間博彩公司第4大股東,而據Bethard喺2019年嘅財政報告,公司當年稅後盈利為2,579萬英鎊。據悉瑞典足總3年前已經知悉事件,但伊巴謙莫域當時已退出國家隊,所以亦冇進一步跟進。

由於歐洲足協同國際足協條例列明,球員唔可以同博彩公司有任何利益衝突,否則會面臨罰款及最高3年停賽令。馬德里體育會右閘捷比亞,上年底就因「畀料」朋友投注自己轉會,被罰停賽10個星期,之前英格蘭前鋒史杜列治,喺2018年亦因類似事件被停賽4個月。伊巴謙莫域早前先至同AC米蘭續約至2022年夏天,但如果今次被歐洲足協罰停賽,佢嘅傳奇足球生涯好可能會提早劃上句號。

Source

作者: HK in UK