隨住歐超聯正式成立,歐洲足協嘅地位受到嚴重打擊,佢哋已發出聲明話會禁制決定參賽嘅12支球隊出戰歐洲賽,網上瘋傳今屆歐聯、歐霸4強賽事將會暫停舉行,不過歐洲多位著名記者都報道,歐洲足協仍未有暫停今屆歐洲賽事嘅方案,今日將開會商討應對方法。
歐聯同歐霸盃4強首回合原定4月底展開,不過剩低嘅8支參賽球隊當中,有5隊都已落實出戰歐超聯,包括歐聯4強入面嘅曼城、車路士同皇家馬德里,以及出戰歐霸盃嘅曼聯同阿仙奴,佢哋都係歐洲足協制裁嘅對象,令兩項賽事嘅處境變得非常尷尬。
6支英超球會決定出戰歐超聯,係新賽事入面最多代表球會嘅地區,英國首相約翰遜亦都發聲明反對歐超聯:「歐超聯嘅計劃會嚴重損害足球,我支持有關當局採取行動,佢哋會打擊本土賽事嘅心臟,亦令全國球迷擔心,所有參賽球會喺作進一步行動前,需要回應球迷同足球社會嘅質疑。」