英格蘭國腳連格自從由曼聯外借去韋斯咸後，表現脫胎換骨，8場比賽就有6球同3次助攻，據報韋斯咸已決定「不惜一切」都要將連格買斷。英國《天空體育》消息指，曼聯見連格依家踢到球王咁款，雖然佢嘅合約只係得番1年，但仍然定價3,000萬英鎊，實行將佢搾到盡。
連格對韋斯咸嘅重要性非常明顯，「錘仔幫」依家係歐聯席位有力挑戰者，如果球隊最後真係殺入前4名，相信3,000萬鎊轉會費都係綽綽有餘。據報曼聯仲打算以連格作為籌碼，希望收購韋斯咸另一英格蘭國腳迪格蘭賴斯，依家就睇韋斯咸點樣決定。
連格日前接受訪問，亦暗示喺倫敦生活係佢爆發原因之一：「環境係會影響球員表現，我喺曼徹斯特住嘅地方好低，入到廚房就黑媽媽，好似個地牢一樣，但係倫敦我住喺高樓大廈，有充足嘅光線，可以望到倫敦所有建築物，自然令你嘅生活更加有新鮮感同活力。」