英超勁旅曼聯周五(19日)宣布，球會已經同環球科技公司TeamViewer達成贊助協議，由下季開始「紅魔鬼」波衫心口位置廣告，將由Chevrolet改為TeamViewer，5年合約總值2億3,500萬英鎊，平均每年4,700萬鎊嘅贊助費，打破英超心口贊助費紀錄。
據英國《太陽報》報道，TeamViewer嘅標誌原本係用藍色字，不過印喺曼聯波衫嘅標誌就會改用白色。消息指TeamViewer更打算利用公司本身革命性技術，發展AR(擴增實境)參觀奧脫福球場嘅軟件，拉近曼聯同球迷嘅距離。
曼聯呢次心口贊助費創造英超紀錄，但喺世全界嚟講並唔係最高，目前球壇「最貴心口」係西甲勁旅皇家馬德里，阿聯酋航空每年畀佢哋心口贊助費高達6,100萬英鎊。