曼市球迷今季可有機會親眼見證球隊捧盃了！英國首相約翰遜周一宣布下月起逐步放寬防疫措施，而3周後業餘體育活動亦可展開，球場可於5月中起重新開放畀公眾入場，意味着曼城嘅煞科戰好有機會主場與球隊分享重奪英超嘅喜悅。
跟據放寬計劃嘅安排，各球場可於5月17日起解封，換言之英超球迷可趕及直擊今季最後一輪嘅賽事，順利話可有限度讓四分一或最多1萬名球迷入場觀戰，而根據賽程目前排英超榜首、有10分優勢嘅曼城，最後一輪於5月23日主場迎戰愛華頓，而紅魔曼聯則作客對狼隊，如果曼城保持這個氣勢，球迷隨時可親眼見證藍月亮捧盃。
不過，英總盃決賽則於5月15日舉行，啱啱喺解封前兩日，球迷只可以透過直播觀戰。