平機會主席朱敏健昨日在立法會政制事務委員會會議中簡報工作進度，建制議員關注內地人在港遭受歧視。朱敏健指有關處理內地人歧視問題的報告書已進入最後階段，大約多開一次會議就可以上交政策局。而政制及內地事務局副秘書長陳潔玲亦表示，當局會於本屆政府任期內，向委員會交上具體修例建議。今時今日乜嘢人喺香港被歧視，梗係唔係内地人啦！
一直以來，內地人喺香港地位高過香港人是常識吧。就以武漢肺炎為例，一年前特區政府堅持唔肯封關，就係因為確保內地人可以自由出入香港，就算要香港人死都唔怕。結果呢，為咗方便內地人進出香港，武漢肺炎成功進入香港，香港死咗接近200人。然之後又繼續推出商務豁免措施同埋回港易計劃，等內地人可以高人一等，唔使隔離21日自由進出香港，就算相關人士來到香港短時間內確診，一樣當佢哋係本地個案，唔當係內地輸入個案。你話呢個安排仲唔係優待內地人咩？咁樣點可能見到有內地人喺香港被歧視呀！香港人係二等公民就真。相反，有另一班人喺香港被政府同埋建制派歧視，呢班就係BNO護照持有人。
自從英國推出BNO 5+1移民計劃之後，內地政府宣布不承認BNO作為護照的資格。特區政府也宣布配合，推出反制措施包括不得使用BNO在本港出入境，不得使用BNO在 本港作為任何形式的身分證明；乘客登機前往本港的航班時，航空公司須要求香港居民，出示特區護照或香港永久性居民身份證；至於未持有其他有效旅行證件的非中國籍本港永久性居民，可向入境處申領簽證身分書，以作國際旅行之用。
建制派也選擇日以繼夜、夜以繼日貶低BNO護照持有人。有人說移民英國的人最終也會回到香港；中聯辦表示英方試圖將大批香港人變成二等公民；香港頭號燈神湯文亮 表示，透過這計劃移居英國的香港人質素不會太高。行政會議成員、新民黨主席葉劉淑儀就形容，因BNO擴權而忽然赴英的港人，只是「難民」，相信他們融入英國社會有難度。葉劉又指港人在英國找工作不容易，她以教師行業為例， 教師需在英國適應當地學制，在當地教中文已「無咁吃香」， 教英文未必夠當地人競爭。
呢班人一日到黑貶低BNO護照持有人，表示相關人士質素唔夠高，去到外國會搵唔到工會失業，會成為二等公民。請問相關講法算唔算係歧視BNO護照持有人，尤其係打算透過相關計劃移民去英國嘅一批呢？如果部分香港人因為持有BNO護照或者計劃申請相關移民計劃，結果遭到政府和建制派大規模抹黑，在公眾場合表示相關人士質素比其他人要低，唔知朱敏健會唔會認為建制派已經喺度違反緊種族歧視條例呢？究竟呢班建制派根據乜嘢準則認為BNO護照持有人質素會比其他人低，去到外國失業機會會比較高，甚至睇死佢哋會返到香港呢？如果冇，咁樣即係建制派純粹透過部分人士嘅護照去對某啲人作出毫無根據嘅指控，表示嗰班人係低質素，去到外國只能夠成為失業嘅二等公民，豈不是就係帶頭歧視BNO護照持有人？
朱敏健，唔知你係咪瞓咗好幾年，所以認為香港需要修訂歧視條例禁止內地人遭到歧視。但明明內地人已經喺香港嘅一等公民，其他香港人就係二等公民，BNO護照持有人幾乎肯定會成為三等公民。第日可能不享本港投票權，甚至係香港公民身份，亦不能夠擔任公職；而家就肯定係比建制派公然歧視，不斷發表貶低BNO護照持有人嘅言論。如果朱敏健真心想減低香港歧視問題，不如第一件事禁止建制派繼續歧視BNO護照持有人好過啦！