英國開放予持BNO港人的新簽證1月31日開始申請。申請人網上申請後，可預約前往北角簽證申請中心提供指紋以辦理手續。開始辦理的首天，北角簽證申請中心自早上起就陸續有人前來，不少人都帶同子女。他們指，希望盡快辦理好手續離港，憂慮政權之後會再有動作，令移民計劃生變。
蘇先生與太太及兩名子女，約中午時分來到簽證中心交文件及登記指紋，等了約兩小時。特地選在首天前來，是希望盡快離開，「早走早著呀，等咩？佢派返護照就即走喇。盡快搞好盡快走，因為你唔知中共下一步做咩，佢而家就話唔承認BNO，下一步佢如果凍結你銀行，咁我啲錢點？如果等到23號（註：2月23日開始可以用手機程式登記生物辨識資料），唔知佢又諗埋啲咩屎忽鬼嘢。」他們今天提交證件後，需要等約12個星期才會獲交還證件。
位於北角的簽證申請中心，可辦理英國、澳洲、新西蘭及愛爾蘭等地的簽證。職員在門外協助前來的市民，大部分人均表示申請英國簽證。偶爾會有沒登記預約的人直接前來，希望申請簽證，被職員指示要先上網登記。記者中午逗留約一個半小時，亦不時見到有市民前來，不少人均帶著子女。
問他為何離開香港，蘇先生不加思索：「政治問題，憎死林鄭。」他一輪咀說起對政府施政的不滿，「中國愈嚟愈離譜，違反哂承諾，總之反轉豬肚就係屎，應成咗嘅嘢做唔到……50年不變，而家幾多年呀？而家邊有一國兩制？中央話乜就乜」、「撥錢用哂香港人啲稅，起條爛鬼港珠澳又話穩賺又幾多流量，到頭來而家又話要攞錢；海洋公園攞完錢又攞，香港人有幾多錢畀佢？」
「中共好離譜，留喺度冇前途。」眼見香港前景愈發黯淡，為了一對子女，夫婦決定要離開生活多年的地方，「我就冇得同佢衝喇，但係佢哋冇理由留喺度㗎嘛。」蘇太亦說，對香港的教育感到擔憂，「學校之後教啲咩呢，可能佢嗰啲歷史係完全篡改哂，只係講啲中國啱聽嘅嘢。唔想佢哋連個真相都唔知。」
蘇先生說，回歸後香港情況愈來愈差。這種不滿其實已積累了一段時間，由單程證政策，到影響生活的內地自由行，再到屯門公園跳舞大媽，「我住屯門，公園都唔係我哋去嘅」，他指指一對子女，「佢問我點解姨姨咁跳舞，我話我點知呀！」
他覺得，是去年的運動促成英國推出此新簽證，「所以好多謝啲年輕人，將來佢哋（子女）大個我都話返畀佢哋聽，冇佢哋你哋過唔到去……你（以前）就咁移民英國嘅話，你冇返兩三球點走？」蘇先生一家現在直接申請5年簽證，連同簽證費、移民健康附加費等，目前已付了13萬多港元。
行會成員葉劉淑儀近日主張剝奪持BNO港人的居民身分和公民權利，包括選舉權等。不過蘇先生直言不擔心，反問：「你諗下嘞，你覺得有投票權咩？你投嗰啲咪DQ你囉，好似初選都搞到你班人咁，我真係唔覺得有投票權囉。我唔會信香港（政府）了。」
何先生與妻子及子女一同前來，亦是希望可以盡快完成手續卦英，「黃傘嘅時候已經想走，舊年運動後都一定要走，國安法後就更無可能留喺度。」另外亦有家長表示子女已在香港退學，希望盡快申請以讓小朋友在英報讀學校。與父親前來的年輕人胡先生亦表示，眼見香港如今的情況，希望盡快離開，到英國適應新生活，「想盡快交哂所有嘢畀佢，等佢快啲批，因為佢都要等幾個月先拎到VISA。」
英國新簽證1月31日下午5時開始可以在網上申請，並預約前往簽證申請中心登記指紋；2月23日起，可透過「英國移民：身分檢查」手機App，掃描其生物特徵護照以辦理手續，毋須親身到簽證申請中心。
英國政府去年7月宣布，為回應中國在港實施港版國安法，推出特別簽證予擁有BNO身份的港人及其近親，申請人可一次過留英5年，或分開兩次，每次為期30個月，期間可以工作或讀書；5年後如能滿足若干要求，可申請定居身分，再定居1年就可以正式申請英國國籍。