「5+1」今起申請90後棄鐵飯碗赴英申BNO移民「好多香港碩士博士爭做廚房工」

【本報訊】BNO「5+1」居英簽證今日起開放申請，成為香港人的逃生門。當特首林鄭月娥對國際傳媒說看不到為何有大量港人移民英國的時候，27歲的Jonas去年已「裸辭」放棄本港公營機構鐵飯碗，隻身遠渡英倫展開新生活。預備申請BNO簽證的他，移民路並不順利，甫到埗即遇上疫潮，一年來經歷過失業、轉職、受排擠，更令他心酸的是看到有大量來自香港的高學歷移民應徵廚房助理。崎嶇前路未有打擊Jonas的移民夢，只因居英黃金機會是「靠香港班年輕人打返嚟」，他矢言要在第二個家珍惜得來不易的自由。

特約記者：譚志輝

「我嚟英國前仲諗住順便避一下疫潮，點知避無可避。」訪問翌日，英國本土感染武漢肺炎死亡人數突破十萬，但Jonas約一年前決定來英時，當地只得零星確診個案，「我以為疫情只局限於亞洲，去年2月初持工作假期簽證到倫敦，不足一周就第一次鎖國」。

Jonas在香港因想打政府工而進修，取得高級文憑後獲職訓局聘為長工，收入不俗且穩定，一做五年卻覺人生無甚意義，「始終係政府架構，幾時升職加幾多咁寫好晒，搞到個人好懶散，好多嘢都會是但啦求其啦，（人工）可以加得幾多？」

最終Jonas決定裸辭到英國闖一闖，但疫潮下難搵工，失業逾三個月，「我有預一年左右生活費，但個心都好怯，始終你不停使錢冇收入」。幸得友人轉介，Jonas終獲大型華人食品公司聘為銷售助理，「我知好多香港人嚟到都抗拒打華人工，但對我嚟講反而係好嘅過渡，因為華人公司一般中高層都係英國人，但同事同客人都係講廣東話，可以慢慢趁機練習英文之餘，唔明白上司講咩又可以向同事請教」。

助求職港人　遭內地老闆質疑

Jonas一洗在港頹風，在新職位積極進取，獲英國上司賞識，入職第四個月即升職，令他十分興奮，「唔係話喺香港冇試過升職，但我始終喺政府架構中工作，升職係睇年資，但𠵱家喺私人公司做，係睇表現成績」。不過，公司的資深員工眼紅他「遲嚟先上岸」，向大老闆打小報告，對他造成困擾，剛好有客人開新餐廳聘請總經理，他決心一試，毅然轉職。

作為新餐廳總經理當務之急當然是請人，Jonas希望盡量幫助剛來英的港人，卻換來心酸和麻煩，「我請一個廚房助理，一日竟然收到50、60個香港人申請，我人生第一次審視人哋嘅履歷表，睇到好心酸，大部份學歷都比我高，碩士博士都有，好多曾經係大公司高層，但𠵱家應徵呢份最低工資嘅工作」。

Jonas專請港人的決定惹來同事質疑，內地老闆娘亦經常借故質疑Jonas的港人身份認同，「你都不是中國人嗎？」雙方矛盾漸生，Jonas說：「我當然會駁返去，但無論如何，開始發現大家嘅價值觀好唔一樣。」例如他堅持按法定最低工資請基層員工，但老闆娘每每阻止，只求賺多一分半毫，「我留得喺度就希望做個良好英國公民，尊重呢度嘅制度同精神」。最後他只好辭職，近日獲一間英國食品公司聘用，「全公司得我一個講廣東話，我覺得係種進步」。

新簽證計劃　「靠年輕人打返嚟」

回看來英一年，他感謝一眾來英後認識的港人互相扶持，「我最近一個月租嘅地方熱水爐壞咗，冇熱水又冇暖氣，得一、兩度時好難捱，多得唔同朋友肯喺lockdown期間都接濟我，畀我去佢哋度暫住」。

Jonas即將申請BNO簽證，如無意外六年後會正式入籍成為英國公民，他希望這六年間可真正融入英國，「我其實嚟到就登記做選民，投票前亦會做好功課，好好珍惜呢張選票。總之我會放低香港人嘅身段，做個實實在在嘅英國公民」。他最感激是香港的前線抗爭者，「我本來最壞打算要同當地人結婚先留得低，但突然有BNO visa，係靠香港班年輕人打返嚟，我好慚愧」。