國金89樓｜2800億資金移英的恐慌（程總裁）

美國銀行（BofA）分析師上周發表一份報告，題目為「Will BNO emigration impact Hong Kong’s Linked Exchange Rate System？」，提到今年高達2,800億港元或移英，獲得傳媒大篇幅報道。這類題目可以歸類為「里昂風水指數」級別，本身趣味為主，常識都知道難發生，點知本總裁翻開份報告，嘩，原來認真寫架喎。

報告洋洋灑灑好多字，本身歸類重點有3個：1、引述英國內政部有321,600名香港居民未來5年會移民英國；2、移民增加令人懷疑可能有龐大資金流走及對聯滙有啟示；3、2021年會有2,800億港元流走，港元會輕微轉弱。

一般市民睇完報紙報道這新聞，應該會感到震撼，覺得香港金融要爆了，但細睇其分析理據，理據不免粗疏了。

2,800億港元如何計算出來？首先假設是基於英國內政部本身移民估算；繼而估計赴英港人會賣樓，而作價是按香港統計處資料假設九龍區500呎樓730萬元成交價計算，呎價僅14,600元。分析師再以平均按揭成數18.1%，計算本身未償還貸款水平，假設全部歸還並帶錢走人。

仲未完，美銀再用港人MPF戶口平均持有21.7萬元，再估算走的人英文較好、技能較高、年紀較大，所以平均有30萬港元可以提走。然後2,800億港元資金流走就計咗出嚟。

問題喺邊？香港移民人數增加，亦有人因此賣樓，毋庸置疑。但香港金融市場過去一年非常熾熱，業界係搵到大錢，不少人留低搵食，選擇做「太空人」，老婆同子女英國升學；而正正係咁，香港人好難大規模賣樓；就算全家搬走，唔少人寧願出租賺現金流，喺英國再買多間，倫敦以外200萬港元樓下唔難搵，好多港人買得起。

至於九龍區呎價14,600元估算如何離地，求其翻開報紙睇樓盤成交都知咩事；MPF提走亦非必然，現時中國政府極憎英國政府搶走港人，BNO Visa提取MPF隨時諸多阻撓；退一步假設MPF順利解凍，難道真的會全送去英國滙豐銀行做定存？聰明的港人資金留港，炒美股、港股、IPO孖展賺大錢好過。

而其實，講移英導致2,800億資金流走，係絕對冇意思。Capital Outflow同Net Capital Outflow好大分別，金管局回覆本地傳媒都有提過，香港本身資金就進進出出架啦。現實係舊年湧入4,000億港元冇流走，港滙未顯著轉弱，拆息歷史低位徘徊，北水破紀錄湧入港股，加上上述講香港人未必會真係帶錢走，種種原因，呢份投行報告都頗Failed，當然最後佢都有提到對聯滙制度冇影響。

本總裁唔係想講「香港無事」，但要提出香港有問題，理據要相當充份，不能將資金整體淨流入情況，只講成香港走資英國。而事實上，這類報告容易激嬲阿爺，未知美銀投行IPO生意會否受影響，而報告trading ideas欠缺，唯一贏家是新聞界——走資是上乘的報道材料。

程總裁

www.facebook.com/IFC89

—————————–

掌握理財智慧 感受生活品味

investMAN全新網頁 優雅登場

—————————–

部署退休 輕鬆達至財務自由

點擊即睇《退休理財天書》

—————————–

【全球樓行】 Dream House零距離

屬於香港人的移民攻略

—————————–

支持蘋果深度報道，深入社區，踢爆權貴，即Like蘋果專題及調查組FB專頁！