姐姐真勇武

作者:HK in UK

1 月 11, 2021

一直以來好想選特首,口水流到就快脫水嘅姐姐葉劉淑儀,今日發揮勇武本能,在《南華早報》撰文,表示中國政府正考慮採取反制措施,回應英國給予BNO護照持有人申請居留權。葉劉淑儀認為,內地或是時候執行國籍相關法例,禁止雙重國籍。葉劉淑儀認為可以提出一個確實的「截止日期」,這個日期後,獲取外國籍的港人,會被視為出於自己意願,根據中國國籍法第9條放棄中國籍,亦會自動失去持有特區護照的權利,亦可能失去香港居留權和香港選舉的投票權。姐姐呢個建議,筆者舉腳贊成,一於將截止日期定喺1841年,確保今時今日所有留喺香港嘅香港人全部都係愛國愛港,唔會有任何外國勢力喺香港搞搞震,更加要特區政府重要人物直系親屬全部放棄外國國籍。 

Regina Ip:For Hongkongers who decide to leave, it’s time they had to choose: foreign citizenship or right of abode in Hong Kong(SCMP,2021.01.10)

葉劉淑儀資料照片

坦白講平民百姓擁有雙重國籍,無傷大雅。阿茂阿壽唔通都可以勾結外國勢力咩!同政要有密切關係嘅直系親屬就唔同啦。問責局長、行政會議成員、立法會議員、人大、政協的另一半,仲有親生仔女姐妹,同埋其他有血緣親屬,如果擁有外國國籍,又一時間惹上桃色糾紛,成為十一哥或者十一仔,而相關艷照同情色片段被外國勢力控制,佢哋喺政府入面嘅屋企人會唔會被外國勢力要脅,出賣香港同埋偉大嘅祖國呢?為咗維護國家安全,呢班勾結外國勢力嘅政要,唔該率先叫自己直系親屬放棄多餘的外國護照,做個勇敢中國人,為自己嘅中國人身份感到自豪。佢哋包括林鄭月娥丈夫及兩名兒子、鄭若驊的丈夫、陳茂波妻子及子女。如果計埋立法會議員、行政會議成員、同埋人大政協,相信有大把人要排住隊證明自己愛國愛港。係囉!中國咁強大,你班政要嘅屋企人做乜仲攞住本外國護照?要攞梗係攞中國護照,係咪先! 

葉劉淑儀嘅勇武行為簡直令人眼前一亮,筆者實在找不到理由支持葉劉淑儀呢個政治正確嘅行為。不過除咗以上呢班重要人物,唔知葉劉淑儀女兒嘅國籍又係乜嘢呢?聽講葉劉淑儀女兒葉榮欣現時滯留喺英國返唔到香港。喂喂,究竟你個女做乜要留喺日落緊嘅英國,當年又喺可恥嘅美帝讀書呢?唔通你就係傳說中嘅勾結外國勢力分子,仲要一次過勾結英美兩國?葉劉淑儀係時候你都同大家交代一下女兒嘅國籍問題,仲有點解要留喺英國,如果唔係我驚你自己都犯緊國安法喎!

Source

作者: HK in UK