隔牆有耳：公僕宣誓副局政助先上路（李八方）

港版國安法出現後，金鐘添馬艦一直盛傳要宣誓效忠，早排林鄭《施政報告》公佈全體公務員宣誓，八方早有聽聞唔少公務員好擔心，唔係因為怕國安法，而係擔心日後影響佢哋BNO移民英國，甚至關乎佢哋日後拎唔拎到英籍。噚日政府終於宣佈首批「落水名單」，約46個副局長、政助同政策局常秘，要首先洗濕個頭。

傳今舉行儀式

有消息話，公務員未宣誓前，包括12個政策局既副局長同政治助理，加上政務司司長同財政司司長各自一名政治助理要先宣誓，政府今日將會有儀式安排畀佢哋宣誓擁護《基本法》和效忠香港特區的儀式，約20名嘅政策局常任秘書長，就會喺聽日宣誓。

八方相當關心會唔會有監誓人，宣誓人讀得慢讀錯字又會唔會DQ呢，不過政府就無答覆。以往好多人入職做副局、政助前會選擇自動放棄外國國籍以示忠誠，但其實《基本法》冇規定佢哋唔可以有外國國籍同居留權，唔知佢哋係咪個個都係忠誠嘅中國公民呢？早排英國有意推《叛國法》，旦凡英國公民宣誓效忠外國勢力或組織，就係犯罪，如果當中有人有英籍或居英權，恐怕幾頭痕！

李八方