之前介紹過既走資渠道包括Monzo，Transferwise，Starling，Revolut，IB， Charles Schwab，Firstrade。今次做啲更新講下最近情況點。
Monzo，介紹時可用BNO加英國PO box開，依家已經開唔到。當然如果你有親戚朋友有英國地址係仲有機會開到。雖然傳聞話間公司財政唔太掂，不過有英國政府保障，我唔係太擔心。
Transferwise Borderless依家應該係方便比香港人開到既戶口，又有debit card同都算平既匯價，多貨幣直接簽卡，香港戶口入錢夠晒方便，收debit card 3個星期左右。缺點冇英國政府存款保障，不過佢自稱存款有保障，我唔係太信。不過要用錢時先入錢，唔好入太多錢，當八達通用，風險唔高。按連結開戶匯款免費(有限額)，匯率算靚。應該係以上唯一未去英國就可以攞到英國debit card既戶口。
Starting 一定要有英國地址證明，我未去英國前用英國Transferwise封開戶信都唔收貨。最後到左英國用council信先開到戶口。不過建議大家到左英國都開返個，一來有政府保障，二來有歐元戶口，三來有類似附屬咭功能既space，我最近都開左張咭俾亞女當零用錢。仲要免費，算係咁。
Revolut個app唔知邊個天才寫既，係香港攪極都可唔到戶口，用晒英國地址加vpn都唔得。一到左英國開又冇事，好怪。都幾多項目要收費。仲要冇政府保障。暫時唔覺佢有乜特別強項。
IB香港開戶當然冇問題，用嚟換錢同借錢宇宙最強。不過香港分公司我有戒心。但係我未去英國前問過佢哋，佢哋話可以成個戶口transfer去英國IB。不過由於稅務問題，所以我應該下個稅務年度先轉。
Charles Schwab其實冇IB咁好，不過始終係美國公司，買個安心。記住係開international account唔好開香港版。暫時仲可到戶口。
Firstrade有美金debit card，申請左，但未詳細試。如果鍾意中文服務，可以考慮。暫時仲可到戶口。
另外，測試開Citi bank張debit card係英國用係有少少問題，而且收費貴。當然你用黎存錢冇問題，記得揀離岸。
唔好問我開唔開得HSBC離岸，大家應該知我點答。唯一原因係你依家要走，冇時間，而你又淨係有HSBC離岸。咁我會建議到左英國即刻開過第個戶口轉晒啲錢走。
其他RBS，Barclays離岸戶口等等有一定資金要求，開戶時間長。趕住走難既唔好唸呢啲。去到英國先開。
大家走資開戶有乜經驗同消息盡量留言update下有需要既人，幫得一個就一個。